Hetta er eitt bíbliuørindi, sum eg eri vorðin glaðari og glaðari fyri, sum árini ganga. Andaktin er ein blandingur av einum vitnisburði og eini andakt. Ein ófatiliga stórur boðskapur liggur í hesum orðunum: “...eingin fordøming fyri tey, sum eru í Kristi Jesusi.”

Mangan havi eg steðgað á og havt trupult við at finna frið og gleði í mínum lívi sum trúgvandi. Sátan vísir mær mína synd, menniskju kunnu peika á mína synd og samvitskan minnir meg á mína synd. Og tá eg hyggi í mítt hjarta, kennist tað so møtismikið at vinna rættvísi.

Tí eri eg vorðin so glaður fyri hesi kendu orðini: “Jeg så på troen, og troen svandt. Jeg så på Jesus, og troen vandt.”

Tí er tað so frígerandi at kunna lesa hetta: "... eingin fordøming fyri tey, sum eru í Kristi Jesusi". Eingin fordøming tá bønarlívið kiksar, eingin fordøming tá andaktslívið kiksar, eingin fordøming tá eg falli í synd. Ein fantastiskur boðskapur at eiga. Frelsan avhongur ikki av, hvat eg kann útinna, men er bert tengd at Jesu verki á Golgata.

Í trúnni á Jesus Kristus er tað eingin fordøming fyri meg og heldur ikki fyri teg. Hetta merkir ikki, at vit kunnu liva og láta, sum okkum lystir, tí vit siga okkum trúgva á Jesus. Nei, trúgvin skapar eina avhengigheit og hungur eftir at hoyra Gudi til, eitt ynski eftir at liva í samfelagi við hann.

Takk Jesus fyri, at í trúnni á teg kann eg standa reinur og fríur, uttan blett ella rukku. Takk fyri frelsuna.

Skrivað hevur Albin Johannessen